कोरोनाको त्रासले बाँच्नुपर्छ होला कतिन्जेल

डा देव नापित

बुढा: जहानको पेट भर्ने चिन्ताले पिरोल्छ सबेरै
काम गर्न पाइएन बन्दाबन्दी भयो है धेरै

बुढी: पैसा छैन कसरी किन्ने नुनतेल तरकारी 
अब त अनाज पनि सकियो रित्तियो भकारी

बुढा: लागेको छ शीघ्र नै यो जिन्दगीको डोरी चुडिन्छ 
परिवारको बिजोग देख्दा मन मेरो कुँडिन्छ 

बुढी: गरेर खाने निम्नलाई पार्न खोज्दैछ सखाप 
भोको पेट मरिन्छ हेर बस्यौँ भने चुपचाप

बुढा: निमुखा मार्न सरकारको प्रयास छ अथक 
तरकारी बेच्दै हिँड्नेको छिनिन्छ तराजु ढक

बुढी: रोगले हैन सरकारले खोस्दैछ बाँच्ने हक 
आस नमार्नू जे गरे नि बाँच्नुपर्छ भरसक

बुढा: यसरी बाँच्नुभन्दा कालले टिपेर लगे बेस 
कोरोना हैन जीवनबाटै खाइसकेँ हरेस

बुढी: पीर धेरै नगर्नू ए प्राण बिन्ती म बिसाउँछु 
मर्ने बात गर्‍यौ भने म सात जुनी रिसाउँछु

बुढा: भोक कहाँ चिन्दछ साहु महाजन र भरिया 
कसले देख्छ भोको पेट च्यातेको दौरा फरिया

बुढी: कोरोनाको त्रासले बाँच्नुपर्छ होला कतिन्जेल 
एकछाक नै खान पाउनु पर्‍यो हे बाँचुन्जेल 

बुढा: को बुझ्ने सवाल भरिएको जनताको लोचन 
सरकार चुक्यो पुर्‍याएन रक्षा गर्ने वचन 

बुढी: ठूला पसल खोल्दा चल्न दिन्न किन ठेलागाडा 
निमुखा बाँच्न नदिन सरकार ल्याउँछ बाधा

बुढा: भोकले घरमा नबस् भन्छ छैन केही राहत 
निरीह भो सुनाउनै नसकिने भो चिच्याहट

बुढी: यहाँकै जनता हौं सरकार गर्दैन पर्वाह 
दीनदुःखी ले त कसरी गरून् जीवन निर्वाह

बुढा: खानेकुरा बाँड्ने ठाउँमा जान गरौं है तयारी 
खान नि दिन सकिनँ यो साल है मेरी पियारी

बुढी: कोरोनाले सिंगो विश्व नै थला पारेको यो वर्ष 
तिम्रो साथ भए यस्ता साल बिताउँछु सहर्ष

बुढा: बिहान खाए भरे के खाऊँ भन्ने मान्छे म आम
कम्तीमा भोको नबस्न गर्न सकिनँ जोरजाम

बुढी: कति नै समयको लागि गर्नुपर्ने त हो जोहो 
जनता नबुझ्ने सरकार यो बनाउने को हो

बुढा: भारी बोक्न नपाउँदा रुने गर्छ है मेरो नाम्लो 
उपाय छैन कसरी बलियो बनाऊँ यो थाप्लो

बुढी: लाखौं गरिबहरूको हेर्नुस् यस्तै छ हविगत 
राम्रो पुर्पुरो चाहिएन तिमी नै मेरो तागत

बुढा: भाडा तिर्न सकेको छैन छोड्नु पर्नेछ है यो डेरा 
अनि हामी बस्ने ठाउँको हुने छैन है चौघेरा 

बुढी: सरकार किन सुन्न खोज्दैन जनताको आवाज 
आफू अघाई अरु भोको राख्छ छैन कुनै लाज

बुढा: भोकोलाई भोजन दिने सक्यो जस्तो छ रिवाज 
गरिबको फोटो खिचेर रमाउँछ यो समाज 

बुढी: सुनेँ  कैयौं भोका खाँदै थिए पानीमा रुझेर 
जनताले दुःख पाए सरकारले नबुझेर

बुढा: भन्थे खान नपाएर मर्नै आँटे साना बालक 
बन्दाबन्दी मात्र गर्ने सरकार छ नालायक

बुढी: रोग हो धनी-गरिबबीच बढाउने खाडल 
विश्व उज्यालो पार्न हटोस् है कोरोनाको बादल

बुढा: गरिबलाई कसरी पाल्ने हो चिन्ता छ गहिरो 
हाम्रो अनुनय नसुन्ने सरकार छ बहिरो

बुढी: अन्धो सरकार देख्दैन आँसुका बलिन्द्र धारा 
रोगले हैन गरिब मार्ने सरकार यो ज्यानमारा

बुढा: सरकार पन्छिदै छ गर्न गरिबको हिफाजत 
यही थिति रह्यो भने उठ्ने छ कदम गलत

बुढी: यो बेलामा खान दिनेप्रति हुनुपर्छ आभार 
यस्तो रीति सबै मिलेर गर्नुपर्छ है सम्भार।

 

प्रतिक्रिया

रिपोर्टिङ गर्दागर्दै कोरोना संक्रमित बन्न पुगेका पत्रकार यस्तो भन्छन