कोरोना कहरमा मल्हम लगाउदै एमाले बाँके, नेपाल र खनालको समेत अभियानमा सहयोग

नेपालगन्ज : नेकपा एमाले बाँकेले कोभिड संक्रमण भई अस्पतालमा उपचारका लागि आएका विरामीहरुमध्ये विपन्न तथा असहायहरुका लागि वेडको खर्च व्यहोर्ने भएको छ ।

कोभिड महामारीको बढ्दो संक्रमणले बाँके जिल्ला आक्रान्त बनिरहेको बेला नेकपा एमाले बाँकेले गरिव तथा विपन्न समुदायका ब्यक्तिहरुको उपचारमा सहयोग पुर्याउन दैनिक १० बेडको खर्च सहयोग गर्ने भएको छ ।

आर्थिक रुपले गरिब, विपन्न परिवारका व्यक्तिहरुले प्रयोग गरिरहेको अक्सिजनसहितको १० बेड सहयोग गर्न लागिएको एमाले बाँकेका सचिव रत्न खत्रीले बताए ।

यसका लागि एमाले बाँकेलाई जिल्ला कमिटि सदस्यहरु तथा पार्टी कार्यकर्ताहरुबाट करिब ८ लाख रुपैयाँ सहयोग संकलन भैसकेको छ भने नेकपा एमालेका वरिष्ठ नेता माधवकुमार नेपाल र झलनाथ खनालले समेत यो महामारीको समयमा एमाले बाँकेले गरेको कार्य सह्रानिय रहेको भन्दै अभियानमा सहयोग गरेको एमाले बाँकेका सचिव खत्रीले बताएका छन् ।

सरकारले सबै कोभिड विरामीहरुको सम्पूर्णरुपमा निःशुल्क उपचार गराउनुपर्ने दायित्वलाई सम्झाउन पार्टीले यो अभियान सञ्चालन गरेको एमाले बाँकेका सचिव खत्रीले बताए ।

यो अभियानका लागि एमाले बाँकेले पार्टी नेता दलबहादुर सुनार र अशोक कोइराला संरक्षक तथा सचिव रत्न खत्रीको संयोजकत्वमा ११ सदस्यीय व्यवस्थापन समिति गठन गरेको छ । दैनिक संक्रमण दर पनि तीव्र गतिमा बढिरहँदा सरकार गम्भीर नभएको बताउँदै पार्टीका सचिव तथा अभियानका संयोजक खत्रीले यो अभियानमा जोडिन सम्पूर्ण पार्टी कार्यकर्ता तथा शुभेच्छुकहरुलाई आह्वान गरेका छन् ।

नेपालमा नयाँ भेरिएन्टसहितको कोरोना भाइरस (कोभिड–१९) को दोस्रो लहर प्रवेश गरेसँगै दैनिक संक्रमण दर पनि तीव्र गतिमा बढिरहेको सबैभन्दा पहिले विश्व स्वास्थ्य संगठन लगायतका स्वास्थ्य सम्बन्धी निकायले तोकेका स्वास्थ्य मापदण्ड पालना गर्न सम्पूर्ण जिल्लाबासीहरुमा आग्रह गर्दै उनले आवश्यक सावधानी एवं सतर्कतासहित स्वयंसेवकीय भूमिका निर्वाह गर्न पार्टीका सम्पूर्ण नेता कार्यकर्ताहरूलाई आग्रह गरेका छन् ।

उता यस अघि नै युवा संघ नेपाल लुम्बिनी प्रदेशले बाँकेको कोरोना कहरमा सहयोग गर्न समेत अपिल गरिसकेको छ । बाँकेमा कोरोना संक्रमण र उपचारको अभाव रहेको खबर आए संगै युवा संघ नेपाल लुम्बिनी प्रदेशले सबैलाई एकजुट भएर महामारीमा सहयोग गर्न अपिल गरेको थियो ।

प्रतिक्रिया