नेपालगन्ज बसपार्क नजिकै मर्मतका लागि राखिएको बसमा आगलागी

नेपालगन्जको एउटा बसमा आगलागी भएको छ । नेपालगन्ज उपमहानगरपालिका–४ बसपार्कको विद्युत रोडको घर्ती बसबडी मर्मत सेन्टरमा मर्मतका लागि राखिएको नेपालगन्ज–मुगु चल्ने भे १ ख २९०४ नम्वरको बसमा गएराती आगलागी भएको वडा प्रहरी कार्यालयका इन्चार्ज डिल्ली बहादुर खड्काले जानकारी दिनुभयो ।

नेपालगन्ज–९ का डबल रोकायको नाममा रहेको बस मुगु छाँयानाथ रारा नगरपालिलका–६ का गोविन्द भामले किन्नुभएको थियो ।

गएराती साढे १ बजेतिर भएको आगलागीबाट बस जलेर पूर्णरुपमा क्षतीग्रस्त भएको छ । आगो लागेको खवर थाहा पाएलगत्तै घटनास्थलमा पुग्नुभएका खड्काले आफु चढ्ने गाडीमा राखिएको फाएर बालबाट आगो निभाउने प्रयास गर्नुभएको थियो ।

त्यसपछि बारुणयन्त्र, प्रहरीलगायतको पहलमा आगलागी नियन्त्रणमा आएको थियो । आगलागीको कारण भने खुल्न नसकेको प्रहरीले जनाएको छ ।

प्रतिक्रिया