नेपालगन्ज : शिक्षा क्षेत्रमा आफ्नो छुट्टै पहिचान बनाउन सफल रहेको बाँकेको जानकी गाउँपालिका वडा नं ३ कोरियनपुरमा रहेको जे.एस. बोडिङ्ग स्कुलमा सरस्वती पूजाको शुभ अवसरमा नर्सरी कक्षामा ७३ जना नयाँ विद्यार्थी भर्ना भएका छन् ।
पछिल्लो समयमा नेपालगन्ज शहरको नजिकै रहेको उक्त विद्यालय विद्यार्थी तथा अभिभावकहरुको रोजाइमा पर्ने गरेको छ । शान्त वातावरणमा दक्ष, अनुभवी शिक्षक शिक्षिकाद्वारा पठनपाठन गराइने विद्यालयमा कक्षा १० सम्म पढाइ हुने गरेको छ । उक्त विद्यालयमा हरेक हप्ता विद्यार्थीहरुलाई अतिरिक्त क्रियाकलाप गराइने गरेको विद्यालयका प्रिन्सिपल राजु मल्लले बताउनुभयो ।
बुधबार सरस्वती पूजाको अवसरमा विद्यार्थीहरुले बनाएका आर्ट्स प्रदर्शनी गरिएको हो । विद्यालयमा उल्लेख्य रुपमा अभिभावकहरुले उक्त प्रदर्शनी अवलोकन गरेको विद्यालयका प्रिन्सिपल मल्लले बताउनुभयो ।
आफ्नै भवन निर्माण गर्न लागेको उक्त विद्यालयले निकट भविष्यमा कक्षा ११ र १२ पनि सञ्चालनमा ल्याउने प्रिन्सिपल मल्लले बताउनुभयो ।
