जानकी गाउँ पालिकाका विद्यालय शुक्रवारबाट सञ्चालन

जानकी गाउँपालिका मातहतका सम्पुर्ण विद्यालयहरु भौतिक उपस्थितिमा शुक्रबारबाट सञ्चालनमा आएका छन ।

कोरोना भाइरस (काेभिड-१९)को महामारीले बन्द विद्यालय आजबाट स्वास्थ्य सावधानीका उपाय अपनाएर खुला गरिएको हो ।

बढ्दो कोरोना संक्रमणका कारण लामो समयदेखि बन्द भएका विद्यालयहरुलाई शुक्रबार (२५ गते) बाट भौतिक रुपबाटै पुनः सञ्चालन गर्नका लागि गाउँपालिकाले अनुमति दिएको छ ।

डिसिएमसिको बैठक अनुसार भौतिक उपस्थितिमै कक्षा सञ्चालन गर्न पाउने गरि निर्णय गरेको थियो । सोही बमोजिम गाउँपालिकाले शुक्रबारदेखि विद्यालय सञ्चालन गर्न निर्णय गरेको छ ।

मंगलबार (भदौं २२ गते) शिक्षा समितिको बैठकको निर्णय अनुसार २५ गतेबाट विद्यालय सञ्चालन गर्नका लागि अनुमति दिने निर्णय भएको र सूचना समेत सबै विद्यालयमा पठाएको शिक्षा, युवा तथा खेलकूद शाखा अधिकृत प्रतिभा ओली खड्काले बताउनुभयो ।

कोभिड-१९ को संक्रमणम दरमा कमि आएकोले स्मार्ट लकडाउन २०७८ कार्यविधी अनुसार नियमित पठनपाठन पाठ्यक्रम समायोजन ढाँचा २०७७ अनुसार सञ्चालन गर्न आवश्यक स्वास्थ्य सुरक्षाको मापदण्ड पालना गर्नुपर्ने शर्त राखिएको छ । विद्यालय सञ्चालन अवधिमा कक्षाकोठाको अभावका कारण मा. वि का हकमा दुई सिफ्टमा पठनपाठन सञ्चालन गर्न सकिने बिज्ञप्तिमा उल्लेख छ ।

गाउँपालिका मातहतका विभिन्न वडामा २४ वटा सामुदायिक, १४ वटा मदरसा, १ वटा गुरुकुल, १८ वटा सामुदायमा आधारित बालविकास केन्द्रहरु र ८ वटा संस्थागत विद्यालय गरी कुल ६५ वटा शिक्षण संस्था रहेका छन् । भने विद्यार्थीलाई असोज १ गतेदेखि लागू हुनेगरी सम्पुर्ण विद्यालयले (०.५) दिवा खाजा कार्यक्रमलाई पुनः कार्यान्वयनमा ल्याउने निर्णय समेत गरेको छ ।

प्रतिक्रिया